Dźěło w horće

Dźěłamy po koncepće wotewrjeneho dźěła. Dźěći smědźa w běhu hortoweho popołdnja sami rozsudźić, z čim chcedźa so zaběrać, što chcedźa wuslědźić abo nazhonić. Přidatnje móža so na wšelakich planowanych poskitkach na přikład pječenje, wočerstwjenje, pohibowanske hry a na wšelakich projektach wobdźělić. Tak zamóža sej hortowe dźěći sami popołdnjo po swojich zajimach a našich poskitkach zarjadować. Damy dźěćom swobodu za jich kreatiwitu, fantaziju a wćipnosć. Swobodne dźěło woznamjenja pak tež, zo dźěćo same rozsudźi, hdy so wone wróćo sćehnje, z kim so hrajka, hdy so ze swojimi idejemi přesadźi a kak zarjaduje so do cyłka.

Skupinske hodźiny zmóžnja mjezsobnu wuměnu nazhonjenjow a rozmołwy k aktualnym prašenjam dźěći. Na tute wašnje spěchuje so zhromadnosć hortoweje skupiny a planowanje po zajimach dźěći su móžne.

Swjedźenje a swjatočnosće, projekty a wulěty do blišeje wokoliny su kruty wobstatk při rjadowanju wšědneho dnja w horće.

Kóžda rjadownja jedneho lětnika ma krutu kubłarku, na kotruž móže so přeco wobroćić. Prawidłownje přewjedu so skupinske hodźiny po lětnikach ze skupinskimi kubłarkami. Dalše informacije namakaće pod dypkom:  Naše pedagogiske dźěło.

Hižo w předšulskej skupinje  našeje pěstowarnje "K wódnemu mužej" Worklecy dóstanu dźěći móžnosć sej hort wobhladać. To zmóžni so přez hortowe wopyty, zhromadne hrajkanje, wobhladanje rumnosćow a zeznaće hortowych kubłarkow a kubłarjow.

Na spočatku šulskeho lěta so šulscy nowačcy prěnje 14 dnjow w šuli wotewzaja a do horta wjedu. W prěnich tydźenjach zeznaja so dźěći z wašnjom žiwjenja w horće a z wosobinami kotřž jich přewodźeja. Woni zeznaja wotběh, prawidła a domjacy porjad w horće.

Wot póndźele do štwórtka mjez 12:15 hodź. do 14:30 hodź. maja dźěći móžnosć samostatnje pod dohladom kubłarki a kubłarja k zhotowjenju swojich domjacych nadawkow. Prěni lětnik zhotowi swoje nadawki zhromadnje ze swojej kubłarku hač do 13:00 hodź.

W času 20 mjeńšinow ma dźěćo w 1. a 2. lětniku čas za spjelnjenje nadawkow. Za 3. a 4. lětnik su potom 45 mjeńšinow podate.

Zamołwitosć na dospołnosć a prawe wuslědki nadawkow so njepřewzaja. Starši wšědnje doma nadawki swojeho dźěsća kontroluja.

Dohladowanje hortowych dźěći w prózdninach so indiwidualnje rjaduje.

Wotewrjenske časy orientuja so při tym na přizjewjenjach w ramiku 7:30 hodź. do 16:00 hodź. Zhromadnje z dźěćimi planuje team w předpolu poskitki a projekty. Při tym wobkedźbuja so zajimy dźěći a načasne wobstejnosće. Su to na přikład wopyt muzeja, olympiady abo wulět do bliskeje wokoliny.

Smy žiwi w sydlišću Serbow. Naše kubłanišćo je dwurěčne.Tuž je wužiwanje  serbskeje a němskeje rěče kruty wobstatk našeho skutkowanja.

W lětnym wotběhu su serbske nałožki a tradicije kruće zakótwjene.

Štyri počasy nalěćo, lěćo, nazyma a zyma su kruty rytmus, kotrež tworja zakłady dźěła z našimi dźěćimi. K wjerškam słušeja: póstnicy, katechezy w póstnym času, jutry, dźeń dźěsća, žnjenski swjedźeń, dźeń swjateho Mikławša, adwentny čas a hody. Tež narodniny našich hortskich dźěći so swjeća.

"Dźeń wotewrjenych duri" kóžde lěto zajimcow w domje wita.

Kooperacija mjez šulu a hortom je wažny stołp. Wobaj domaj ležtaj njedaloko wot so na samsnej ležownosći. Tak so zhromadne dźěło wšědnje derje organizuje. Ramikowe wuměnjenja k zhromadnemu dźěłu su w kooperaciskim zrěčenju, kiž so stajnje na spočatku šulskeho lěta dorěči, zapołožene. Wjednistwo horta a / abo wotpowědne kubłarki / kubłarjo wobdźěla so na prěnich staršiskich wječorkach w šuli. Wjednistwo horta so na šulskej konferency wobdźěli.

Naš hort pěstuje hišće dalše kooperacije w gmejnje a blišej wokolinje. Prawidłownje chodźa dźěći z horta na bajkowu hodźinku. Jónu wob lěto wotměje so turněr w kopańcy z hortowymi dźěćimi z Chrósćic.

Tohorunja wopytamy wobydlerjow w Chróšćan starowni Swj. Ludmile a zwjeselimy wobydlerjow z našimi spěwami a w zhromadnym hraću.

Po wotwerjenju dnjoweje hladarnje we Worklecach "Při krabatowym puću" chcemy tež tu zhromadne kooperaciju wuwić.

Praktikanća su pola nas w domje stajnje lubje witani.

Chcemy jim zmóžnić, so z pedagogiskom dźěłom w horće zeznajomnić a z tym dohlad do našeho skutkowanja dóstać. Wuspytaja so a nałožuja přiswojenu wědu při kubłanju.